content page template

Wanem nao Music Bridges?

Music Bridges: wan program blong musik long Saot Pasifik mo Mozambik

Music Bridges hemi wan tu yia projek(2013-2014) we i bildimap musik mo rilsensip bitwin Vanuatu mo Mozambique wetem sapot i kam long Europe blong helpem ol musisen blong mekem gud prodak blong olgeta mo gat wei blong netwok wetem ol narafala musisen.

Projek ia hemi karem fanding long Africa Caribbean Pacific (ACP-EU) Cultures+ program blong European Union.  Maneja blong projek hemi wan organaesesen long Itali: Coordinamento delle Organizzazioni per il Servizio Volontario (COSV), mo tufala patna blong projek i gat Further Arts long Vanuatu wetem Music Crossroads long Mozambik (long Afrika).

Long Oktoba 2013, i bin gat fes bigfala aktiviti blong projek we hemi Singaot Musik Kamp – wan bigfala intanasonel musik iven we i tekples long Vanuatu long taem blong tufala festival Fest’Napuan Musik Festival mo Lukaotem Gud Santo Festival.

Singaot Musik Kamp hemi wan 2-wik program blong ol gudfala yangfala musisen we bae oli kamaot long ol aelan blong Vanuatu mo sam we oli kam ovasis.  Further Arts i manejem aktiviti ia wetem givhan long Canal Studio Asosiesen long Santo.  Vanuatu i tekem bitim 60 musisen we oli kamaot long ol kantri olsem Mozambik mo Reunion (Afrika), Niu Kaledoni, Solomon Aelan,  Fiji, Wes Papua, Papua Niugini, Tonga, Samoa mo Ostrelia.  Mo tu i gat bitim 20 lokol musisien we oli kamaot long ol aelan blong Vanuatu olsem Ureparapara, Tanna, Ambrym, Tongoa, Malakula, Espiritu Santo mo Pentecost.

Bae long 2014, Mozambik bae i mekem wan musik kamp bakeken we hemi blong ol musisen long Mozambik mo Saten Afrika, mo tu bae wan grup blong Vanuatu i tekpat long hem.

Long ol kamp ia, ol musisen oli tekpat long ol woksop blong netwok mo serem musik bitwin olgeta mo blong kivimaot ol show long festival.  Long semtaem, oli tekpat long samfala woksop blong lanem sam niu skil mo save long saed blong kopiraet, laesens mo profesonel divelopmen blong musik.

Contact

Federica (Itali) – federica.besana@cosv.org

Tom (Melanesia) – tommyd@festnapuan.org

Sarah (Vanuatu) – sd.yacv@gmail.com

Rufus (Mozambik) – rufus.maculuve@music-crossroads.net

Partners

Music Crossroads

Music Crossroads hemi open long Mozambik long 1996.  Taem we i stat, i bin gat wan festival nomo we i stap long Maputo siti.  Naoia hemi gru bigwan mo i gat plante festival truaot long Mozambik wetem ol riprisentatif blong olgeta long wan wan eria.  Stat long 2007, Music Crossroads Mozambik hemi kam wan asosiesen we i gat fulap memba insaed long hem.  Mo tu hemi wan asosiesen we Ministri blong Jastis long Mozambik hemi luksave hem. Ol memba we oli stamba blong asosiesen i gat fulap patisipen blong ol festival we i bin pas mo i gat fulap yangfala musisen we oli kam memba.  Mo tu, plante man truaot long Mozambik we oli laekem musik oli kam memba.

Men gol blong asosiesen hemi blong helpem ol yut blong oli gat intres mo talent long musik mo pefoming ats blong oli save kivimaot pefomens folem skil blong olgeta.  Music Crossroads hemi bin mekem plante tua i ko ovasis wetem ol band mo yangfala atis we oli gat janis blong pefom long Yurop.  Olgeta we oli tua i gat Banda Azul, Nfithe, Nyasha, Djaaka, Mussodji.

www.music-crossroads.net/en/content/Mozambique/about

Further Arts

Further Arts hemi wan jaritabol asosiesen long Port Vila long Vanuatu we oli help blong divelopem mo promotem ol atis mo musisen blong Vanuatu inkludum ol prodak mo aktiviti blong olgeta. Further Arts hemi stap mekem bigfala wok wetem samfala oganaesesen long Melanesia  mo Pasifik blong divelopem ol kontemporari musisen, blong gat eksjenj wetem ol narafala musisen mo atis, mo blong promotem tradisonel musik mo danis blong Vanuatu iko long pablik.  Hemi gat strong netwok wetem ol asosiesen blong musik long Vanuatu blong leftemap ol polisi long saed blong musik mo krietif ats.  Vanuatu hemi wan ples we hemi gud blong mekem wok ia mo fulap narafala wok mo divelopmen i stap hapen long ples ia olsem Melanesian Spearhead Group.

 

COSV

Coordinamento delle Organizzazioni per il Servizio Volontario (COSV) hemi wan oganaesesen long Itali we oli mekem ol wok blong helpem ol man long saed blong laef blong olgeta, mo hemi ‘non-profit’.  COSV hemi riprisentem voes blong ol grup we oli wok blong: bildimap pis, lukluk long hao blong stanap long ol raet blong man mo blong invaeronmen.  Mo tu, COSV hemi promotem divelopmen blong kalja, solidarity we hemi agensem racism, mo hemi traem blong mekem se ol man mo ol woman oli save tekpat long ol samting.  Long ol yia we i pas, COSV hemi divelopem ol kaljoral projek blong kivimaot infomesen long saed blong ol atis mo heritage blong olgeta long ol kantri olsem: Bolivia, Syria, Lebanon, Zimbabwe, Kenya, mo ol kantri blong Afrika.

www.cosv.org

Associates

Fondazione Lettera27

Fondazione Lettera27 hemi wan ‘non-profit’ faondesen we hemi stat long Itali long Julae 2006.  Stamba blong hem hemi blong sapotem ol man mo woman blong gat raet blong impruvum litrasi mo edukesen blong olgeta.  Lettera27 hemi minim namba 27 leta blong alfabet we hemi no gat.  Hemi wan tingting nomo blong talem se leta 27 hemi wanem?  Mabe hemi wan misteri, hemi wan rod blong kasem fiuja, hemi wan rod bitwin ol wod we yumi stori wetem mo ol wod we yumi raetem.  Faondesen ia hemi wantem mekem ol aktiviti we hemi helpem ol man blong wok from ‘solidarity’ (olsem yuniti) blong gat akses long litrasi mo blong promotem akses ia.  Ol gol blong faondesen oli winim tru long ol kaen aktiviti we oli givhan long ol pipol we oli no gat gudfala oportuniti long laef speseli ol man we oli stap long ol kantri we i pua o ‘developing’.

www.lettera27.org

SOMAS

SOMAS hemi wan ‘collecting organisation’, we hemi kamaot long Art.74 blong loa blong kopiraet long Mozambik.  Men objektiv blong loa ia hemi blong kolektem manejmen blong ol raet blong ol ota (wan man we i krietem wan at olsem atis o musisen), promotem mo protektem ol intres blong ol memba, mo promotem kaljoral heritej.  Ol men objectiv blong SOMAS: meksua se i gat yuniti mo koperesen bitwin ol ota, helpem olgeta blong krietem ol wok mo at, protektem ol moral mo raet blong ol ota, tekem risponsibiliti blong lukaotem ol moral mo raet long bihaf blong ol ota, selebretem ol agrimen mo kontrak we i gat wetem eni asosiesen o oganaesesen long nasonel o intanasonel level, promotem mo updetem ol memba long saed blong kaljoral mo teknikol level.  Naoia, SOMAS i gat agriment blong kolektem ol ‘royalties’ long bihaf long ol memba blong hem mo hemi pat long wok long kopiraet loa blong mekem se ol man i folem loa mo hemi stret long olgeta.  SOMAS hemi wan memba blong International Confederation of Authors and Composers (CISAC) we hemi stap long Paris, Franis mo SOMAS i akt long bihaf blong ol memba long Conferderation ia long nasonel level long Mozambik.  SOMAS hemi koperet wetem WIPO (World Intellectual Property Organization) mo UNESCO tu.

Donors

CMJN de base

ACPCultures +
Office of the Assistant Secretary General
Department of Political Affairs and Human Development
Secretariat of the ACP Group of States
451 Avenue Georges Henri
1200 Brussels Belgium
Tel: + 32 2 743 06 29
Email: acp-film-culture@acp.int
www.acpculturesplus.eu